ਦਾਰਸ਼ਨਿਕਤਾ ਲਈ ਪਹਿਲੀ ਲੋੜ ਦਲੇਰ ਤੇ ਅਜ਼ਾਦ ਮਨ ਹੁੰਦੀ ਹੈ

Wednesday, July 20, 2011

ਮਲਿਕਾ ਰਾਣੀ ਦੇ ਖੁਦਕੁਸ਼ੀ ਕੇਸ ਸਬੰਧੀ ਪੀ.ਐੱਸ.ਯੂ ਦੀ ਜਾਂਚ ਰਿਪੋਰਟ

ਮਲਿਕਾ ਰਾਣੀ ਦੀ ਖ਼ੁਦਕੁਸ਼ੀ ਸਬੰਧੀ ਇਹ ਰਿਪੋਰਟ ਪੰਜਾਬ ਸਟੂਡੈਂਟਸ ਯੂਨੀਅਨ ਨੇ ਭੇਜੀ ਹੈ।ਵਿਅਕਤੀਗਤ ਤੌਰ 'ਤੇ ਜਾਂ ਕਿਸੇ ਵੀ ਜਥੇਬੰਦੀ ਦੀ ਇਸ ਨਾਲ ਅਸਹਿਮਤੀ ਹੈ ਤਾਂ ਉਹ ਗੁਲਾਮ ਕਲਮ ਨੂੰ ਇਸ ਈਮੇਲ mail2malwa@gmail.com 'ਤੇ ਆਪਣਾ ਪੱਖ ਭੇਜ ਸਕਦੀ ਹੈ।-ਗੁਲਾਮ ਕਲਮ

ਪੰਜਾਬ ਸਟੂਡੈਂਟਸ ਯੂਨੀਅਨ ਦੀ ਜੋਨਲ ਕਮੇਟੀ ਵੱਲੋਂ ਸ਼ਹੀਦ ਮਨੀ ਸਿੰਘ ਸਰਕਾਰੀ ਹਸਪਤਾਲ ਦੇ ਏ.ਐੱਨ.ਐੱਮ ਟ੍ਰੇੇਨਿੰਗ ਸੈਂਟਰ ਵਿੱਚ 4 ਜੂਨ 2011 ਦੇ ਦਿਨ ਵਿਦਿਆਰਥਣ ਮਲਿਕਾ ਰਾਣੀ ਵੱਲੋਂ ਆਤਮ ਹੱਤਿਆ ਕਰਨ ਦੀ ਘਟਨਾ ਦੀ ਜਾਂਚ ਕੀਤੀ ਗਈ। ਜੋਨਲ ਕਮੇਟੀ ਦੀ ਜਾਂਚ ਕਮੇਟੀ ਟੀਮ ਨੇ ਲਗਾਤਾਰ ਮੀਡੀਆ ਵਿੱਚ ਉੱਠ ਰਹੇ ਕਾਰਨਾ ਦੀ ਘੋਖ-ਪੜਤਾਲ ਸ਼ੁਰੂ ਕੀਤੀ। ਇਸੇ ਦੌਰਾਨ ਜਮਹੂਰੀ ਅਧਿਕਾਰ ਸਭਾ ਦੀ ਵੀ ਰਿਪੋਰਟ ਆਈ। ਇਸ ਨੇ ਵੀ ਕੁਝ ਸਵਾਲ ਉਠਾਏ, ਇਹਨਾਂ ਨੂੰ ਵੀ ਸੰਬੋਧਿਤ ਹੋਣ ਦੀ ਕੋਸ਼ਿਸ਼ ਕੀਤੀ ਗਈ ਅਤੇ ਸਮੁੱਚੀ ਜਾਂਚ ਦੌਰਾਨ ਜੋ ਹੁਣ ਤੱਕ ਅਣਗੌਲੇ ਗਏ ਬੁਨਿਆਦੀ ਸਵਾਲ ਸਨ, ਉਹ ਵੀ ਉਠਾਏ ਜੋ ਉੱਚ ਪੱਧਰੀ ਜਾਂਚ ਦੀ ਮੰਗ ਕਰਦੇ ਹਨ। ਅਸੀਂ ਪਹਿਲਾਂ ਸੰਖੇਪ ਵਿੱਚ ਸਾਰੇ ਘਟਨਾਕ੍ਰਮ ਦਾ ਵੇਰਵਾ ਦੇ ਕੇ ਅੰਤ ਵਿੱਚ ਸਵਾਲ ਉਠਾਉਂਦੇ ਹੋਏ ਆਪਣੀਆਂ ਮੰਗਾਂ ਵੀ ਰੱਖਾਂਗੇ।

4 ਜੂਨ ਨੂੰ ਪਤਾ ਲੱਗਦਾ ਹੈ ਕਿ ਮਲਿਕਾ ਰਾਣੀ ਨੇ ਆਪਣੇ ਹੋਸਟਲ ਦੇ ਕਮਰੇ ਵਿੱਚ ਫਾਹਾ ਲੈ ਲਿਆ ਹੈ ਅਤੇ ਉਸ ਦੀ ਮੌਤ ਹੋ ਗਈ ਹੈ ਜਿਸ ਦਾ ਕਾਰਨ ਇਹ ਦੱਸਿਆ ਗਿਆ ਕਿ ਮਲਿਕਾ ਰਾਣੀ ਇੱਕ ਟੈਸਟ ਜੋ ਮੈਡਮ ਕਮਲ ਕੌਰ ਲੈ ਰਹੇ ਸਨ, ਉਸ ਵਿੱਚ ਨਕਲ ਮਾਰ ਰਹੀ ਸੀ ਤੇ ਮੈਡਮ ਨੇ ਲੜਕੀ ਨੂੰ ਕਲਾਸ ਵਿੱਚੋਂ ਬਾਹਰ ਕੱਢ ਦਿੱਤਾ। ਲੜਕੀ ਅੱਧਾ ਘੰਟਾ ਕਲਾਸ ਰੂਮ ਤੋਂ ਬਾਹਰ ਖੜ•ੀ ਰਹੀ। ਉੱਥੇ ਵਾਰਡਨ ਪਾਲ ਕੌਰ ਨੇ ਰਜਿੰਦਰ ਕੁਮਾਰ (ਦਰਜਾ ਚਾਰ ਮੁਲਾਜ਼ਮ) ਨੂੰ ਬੁਲਾਉਣ ਲਈ ਮਲਿਕਾ ਰਾਣੀ ਨੂੰ ਭੇਜਿਆ ਅਤੇ ਆਪ ਸਬਜੀ ਲੈਣ ਚਲੀ ਗਈ। ਇਸ ਤੋਂ ਬਾਅਦ ਮਲਿਕਾ ਰਾਣੀ ਹੋਸਟਲ ਵਿੱਚ ਚਲੀ ਗਈ ਅਤੇ ਦੁਪੱਟੇ ਨਾਲ ਫਾਹਾ ਲੈ ਲਿਆ।

ਅਸੀਂ ਸਾਰੀ ਘਟਨਾ ਦੀ ਗਹਿਰਾਈ ਤੱਕ ਜਾਣ ਲਈ ਜਾਂਚ ਸ਼ੁਰੂ ਕੀਤੀ। ਸਭ ਤੋਂ ਪਹਿਲਾਂ ਪਰਿਵਾਰ ਕੋਲ ਪਹੁੰਚੇ। ਮਲਿਕਾ ਰਾਣੀ ਬਾਰੇ ਦੱਸਦਿਆਂ ਉਹਨਾਂ ਕਿਹਾ ਕਿ ਜਦੋਂ ਮਲਿਕਾ ਰਾਣੀ 6 ਸਾਲ ਦੀ ਤਾਂ ਉਸ ਸਮੇਂ ਉਸ ਦੇ ਪਿਤਾ ਦੀ ਮੌਤ ਹੋ ਗਈ ਸੀ ਜਿਸ ਕਰਕੇ ਉਹ ਆਪਣੇ ਭਰਾ ਤੇ ਮਾਤਾ ਨਾਲ ਕੋਟਕਪੂਰਾ ਆਪਣੇ ਨਾਨਕੇ ਘਰ ਰਹਿਣ ਲੱਗ ਪਈ। ਨਾਨਕੇ ਪਰਿਵਾਰ ਨੇ ਮਲਿਕਾ ਰਾਣੀ ਨੂੰ ਜੋ ਕਿ ਸਾਰੇ ਪਰਿਵਾਰ ਵਿੱਚ ਇੱਕੋ-ਇੱਕ ਲੜਕੀ ਅਤੇ ਮਾਮੇ ਦੇ ਲੜਕਿਆਂ ਸਮੇਤ 6 ਭਰਾਵਾਂ ਦੀ ਇਕੱਲੀ ਭੈਣ ਸੀ, ਨੂੰ ਖੂਬ ਪੜ•ਾਇਆ। ਫ਼ਰੀਦਕੋਟ ਦੇ ਨਾਮਵਰ ਸਕੂਲ (ਐੱਸ.ਡੀ.ਪਬਲਿਕ ਸਕੂਲ) ਤੋਂ ਬਾਰਵੀਂ ਤਕ ਪੜ•ਾਈ ਕੀਤੀ।
ਇਸ ਤੋਂ ਬਾਅਦ ਏ.ਅੱੈਨ.ਐੱਮ ਵਿੱਚ ਦਾਖਲਾ ਲੈ ਲਿਆ। ਉਹ ਵੀ ਕਿਸੇ ਪ੍ਰਾਈਵੇਟ ਸਕੂਲ ਵਿੱਚ ਨਹੀਂ ਬਲਕਿ ਸਰਕਾਰੀ ਏ.ਐੱਨ.ਐੱਮ ਨਰਸਿੰਗ ਸਕੂਲ ਵਿੱਚ, ਜਿੱਥੋਂ ਮੈਰਿਟ ਕਾਫ਼ੀ ਉੱਚੀ ਚੜ•ਦੀ ਹੈ। ਏ.ਐੱਨ.ਐੱਮ ਵਿੱਚ ਦਾਖਲਾ 10ਵੀਂ ਦੇ ਆਧਾਰ 'ਤੇ ਹੁੰਦਾ ਹੈ। ਮਲਿਕਾ ਰਾਣੀ ਨੇ ਦਸਵੀਂ 'ਚੋਂ 67% ਅੰਕ ਲੈ ਕੇ ਪਹਿਲੇ ਸਥਾਨ ਵਿੱਚ ਪਾਸ ਕੀਤੀ ਸੀ।

ਮਲਿਕਾ ਦੇ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ 4 ਜੂਨ ਨੂੰ ਹੋਸਟਲ ਵਾਰਡਨ ਦਾ ਫ਼ੋਨ ਆਇਆ ਕਿ ਜਲਦੀ ਪਹੁੰਚੋ, ਤੁਹਾਡੀ ਲੜਕੀ ਸੀਰੀਅਸ ਹੈ, ਜਲਦੀ ਪਹੁੰਚੋ। ਅੱਧੇ ਘੰਟੇ ਬਾਅਦ ਪੁਲਿਸ ਵਾਲਿਆਂ ਦਾ ਫ਼ੋਨ ਆਇਆ ਕਿ ਤੁਹਾਡੀ ਲੜਕੀ ਦੀ ਮੌਤ ਹੋ ਚੁੱਕੀ ਹੈ। ਜਦੋਂ ਪਰਿਵਾਰ ਬਠਿੰਡਾ ਹਸਪਤਾਲ ਵਿੱਚ ਪਹੁੰਚਿਆ ਤਾਂ ਲੜਕੀ ਦੀ ਲਾਸ਼ ਕੋਲ ਕੋਈ ਵੀ ਨਹੀਂ ਸੀ। ਉਹਨਾ ਨੂੰ ਦੱਸਿਆ ਗਿਆ ਕਿ ਕਮਲ ਮੈਡਮ ਨੇ ਟੈਸਟ ਵਿੱਚ ਨਕਲ ਮਾਰਨ ਕਰਕੇ ਮਲਿਕਾ ਰਾਣੀ ਨੂੰ ਕਲਾਸ ਵਿੱਚੋਂ ਕੱਢ ਦਿੱਤਾ, ਜਿਸ ਕਰਕੇ ਉਸ ਨੇ ਖੁਦਕੁਸ਼ੀ ਕਰ ਲਈ। ਅਸੀਂ ਕਮਲ ਮੈਡਮ ਨੂੰ ਮਿਲਣਾ ਚਾਹਿਆ ਪਰ ਉਹ ਕਿੱਥੇ ਹਨ, ਪਤਾ ਨਹੀਂ ਲੱਗਿਆ। ਪਰਿਵਾਰਕ ਮੈਂਬਰਾਂ ਨੇ ਕਿਹਾ ਕਿ ਅਸੀਂ ਲੜਕੀਆਂ ਤੋਂ ਪੁੱਛਣ ਦੀ ਕੋਸ਼ਿਸ਼ ਕੀਤੀ ਤਾਂ ਕਿਸੇ ਨੇ ਵੀ ਕੁਝ ਵੀ ਦੱਸਣ ਤੋਂ ਇਨਕਾਰ ਕਰ ਦਿੱਤਾ। ਪਰਿਵਾਰ ਵਾਲਿਆਂ ਨੇ ਕਿਹਾ ਕਿ ਕਿਸੇ ਨੇ ਸਾਡੇ ਨਾਲ ਦੁੱਖ ਸਾਂਝਾ ਨਹੀਂ ਕੀਤਾ, ਉਲਟਾ ਘਰ ਆ ਕੇ ਕੁਝ ਵਿਅਕਤੀਆਂ ਨੇ ਧਮਕੀਆਂ ਦਿੱਤੀਆਂ ਹਨ ਕਿ ਤੁਸੀਂ ਸਮਝੌਤਾ ਕਰ ਲਵੋ, ਤੁਹਾਡੇ ਕੇਸ ਦਾ ਕੁਝ ਨਹੀਂ ਬਣਨਾ, ਕਿਉਕਿ ਅਸੀਂ ਸਾਰੇ ਸਬੂਤ ਖਤਮ ਕਰ ਦਿੱਤੇ ਹਨ।

ਇਸ ਤੋਂ ਬਾਅਦ ਅਸੀਂ ਮਲਿਕਾ ਰਾਣੀ ਦੇ ਸਕੂਲ ਪਹੁੰਚੇ ਜਿੱਥੇ ਉਹ ਨਰਸਿੰਗ ਕਰ ਰਹੀ ਸੀ। ਉੱਥੇ ਪਹੁੰਚਦਿਆਂ ਤਿੰਨ ਲੜਕੀਆਂ ਜੋ ਬਾਹਰ ਖੜ•ੀਆਂ ਸਨ, ਉਹਨਾਂ ਤੋਂ ਜਾਣਨਾ ਚਾਹਿਆ। ਉਹਨਾਂ ਕੋਈ ਵੀ ਜਾਣਕਾਰੀ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਇਹ ਲੜਕੀਆਂ ਉਸ ਸਮੇਂ ਵਾਟਰ ਕੂਲਰ ਤੋਂ ਪਾਣੀ ਭਰ ਰਹੀਆਂ ਸਨ। ਅਸੀਂ ਉਹਨਾਂ ਨੂੰ ਕਿਹਾ ਕਿ ਆਪਣੇ ਟੀਚਰਾਂ ਨੂੰ ਦੱਸੋ ਕਿ ਪੀ.ਐੱਸ.ਯੂ ਵਾਲੇ ਆਏ ਹਨ। ਜਦ ਟੀਚਰਾਂ ਨੂੰ ਪਤਾ ਲੱਗਾ ਤਾਂ ਆਉਂਦਿਆਂ ਹੀ ਉਹਨਾਂ ਨੇ ਵਿਦਿਆਰਥਣਾਂ ਨੂੰ ਕਲਾਸ ਰੂਮ ਵਿੱਚ ਜਾਣ ਲਈ ਕਿਹਾ। ਸਟਾਫ਼ ਰੂਮ ਵਿੱਚ ਬੈਠੇ ਅਧਿਆਪਕਾਂ ਨੂੰ ਅਸੀਂ ਜਾਂਚ ਸੰਬੰਧੀ ਦੱਸਿਆ ਤਾਂ ਮੌਜ਼ੂਦਾ ਸਮੇਂ ਦੇ ਪ੍ਰਿੰਸੀਪਲ ਨੇ ਸਿਵਲ ਸਰਜਨ ਤੋਂ ਆਗਿਆ ਲੈ ਕੇ ਆਉਣ ਲਈ ਕਿਹਾ। ਇਸ ਤੋਂ ਬਾਅਦ ਜਾਂਚ ਕਮੇਟੀ ਸਿਵਲ ਸਰਜਨ ਕੋਲ ਗਈ ਤਾਂ ਸਿਵਲ ਸਰਜਨ ਦਾ ਕਹਿਣਾ ਸੀ ਕਿ ਤੁਹਾਡੀ ਜਾਂਚ ਕੋਈ, ਅਧਿਕਾਰਤ ਜਾਂਚ (Official 9nquiry) ਨਹੀਂ, ਇਸ ਕਰਕੇ ਆਗਿਆ, ਨਾ ਆਗਿਆ ਦਾ ਸਵਾਲ ਹੀ ਨਹੀਂ ਪੈਦਾ ਹੁੰਦਾ। ਜੋ ਤੁਹਾਨੂੰ ਕੁਝ ਦੱਸਣਾ ਚਾਹੁੰਦਾ ਹੈ, ਪੁੱਛ ਲਓ। ਅਸੀਂ ਫਿਰ ਸਟਾਫ਼ ਕੋਲ ਵਾਪਸ ਆਏ। ਇਸ ਵਕਤ ਉਹ ਟੀਚਰ ਵੀ ਆ ਗਏ ਜੋ ਪਹਿਲਾਂ ਮੌਜ਼ੂਦ ਨਹੀਂ ਸਨ। ਇਸ ਵਾਰ ਉਹਨਾਂ ਸਾਨੂੰ ਬਿਠਾ ਕੇ ਪੁੱਛਿਆ ਕਿ ਕੀ ਜਾਣਕਾਰੀ ਲੈਣਾ ਚਾਹੁੰਦੇ ਹੋ। ਸਾਨੂੰ ਇਸ ਸਮੇਂ ਵਿਦਿਆਰਥਣਾਂ ਨੇ ਪਾਣੀ ਪਿਲਾਇਆ।

ਸਾਡੇ ਪੁੱਛਣ 'ਤੇ ਉਹਨਾਂ ਦੱਸਿਆ ਮਲਿਕਾ ਰਾਣੀ ਉਹਨਾਂ ਦੀ ਕਲਾਸ ਵਿੱਚ ਟੈਸਟ ਦੀ ਤਿਆਰੀ ਕਰਕੇ ਆਉਂਦੀ ਹੁੰਦੀ ਸੀ। ਨਕਲ ਮਾਰਨ ਦੀ ਗੱਲ ਪਹਿਲਾਂ ਕਦੇ ਸਾਹਮਣੇ ਨਹੀਂ ਆਈ। ਹਰ ਵਾਰ ਆਪਣੀ Presentation ਜਾਂ ਹੋਰ Notes ਚੰਗੀ ਤਰਾਂ ਤਿਆਰ ਕਰਕੇ ਲਿਆਉਂਦੀ ਸੀ। ਪਰ ਸਾਨੂੰ ਸਮਝ ਨਹੀਂ ਆ ਰਹੀ ਕਿ ਮੈਡਮ ਕਮਲ ਦੇ ਟੈਸਟ ਵਿੱਚ ਉਸ ਨੂੰ ਨਕਲ ਦੀ ਲੋੜ ਕਿਉਂ ਪਈ ਜਦਕਿ ਉਹ ਪੜ•ਾਈ-ਲਿਖਾਈ ਵਿੱਚ ਠੀਕ ਸੀ। ਉਹਨਾਂ ਦੱਸਿਆ ਕਿ ਉਸ ਦਿਨ ਤੋਂ ਬਾਅਦ ਮੈਡਮ ਕਮਲ ਨਾਲ ਕੋਈ ਗੱਲ ਨਹੀਂ ਹੋਈ, ਉਹਨਾਂ ਦਾ ਮੋਬਾਇਲ ਬੰਦ ਆ ਰਿਹਾ ਹੈ। ਅਸੀਂ ਜਦ ਪੁੱਛਿਆ ਕਿ, ਕਿਹਾ ਜਾ ਰਿਹਾ ਹੈ ਕਿ ਉਹ ਮਾਨਸਿਕ ਤੌਰ 'ਤੇ ਪ੍ਰੇਸ਼ਾਨ ਸੀ ਅਤੇ ਉਸ ਦੀ ਦਵਾਈ ਚੱਲ ਰਹੀ ਸੀ ਤਾਂ ਉਹਨਾਂ ਵਿੱਚੋਂ ਇੱਕ ਟੀਚਰ ਨੇ ਦੱਸਿਆ ਹਰ ਮਹੀਨੇ ਹਰ ਵਿਦਿਆਰਥੀ ਦਾ ਮੈਡੀਕਲ ਟੈਸਟ ਹੁੰਦਾ ਹੈ, ਜੇਕਰ ਕਿਸੇ ਨੂੰ ਸਿਹਤ ਸੰੰਬੰਧੀ ਕੋਈ ਸਮੱਸਿਆ ਹੈ ਤਾਂ ਉਸ ਦੀ ਬਿਮਾਰੀ ਦਾ ਕੀ ਇਲਾਜ ਚੱਲ ਰਿਹਾ ਹੈ। ਉਹ ਉਸ ਰਜਿਸਟਰ 'ਤੇ ਬਕਾਇਦਾ ਨੋਟ ਕੀਤਾ ਜਾਂਦਾ ਹੈ, ਪਰ ਮਲਿਕਾ ਨੂੰ ਸਿਰਫ਼ ਇੱਕ ਵਾਰ ਬੁਖਾਰ ਹੋਇਆ ਸੀ। ਉਸ ਦੇ ਮਾਨਸਿਕ ਤੌਰ 'ਤੇ ਬਿਮਾਰ ਹੋਣ ਅਤੇ ਦਵਾਈ ਸੰਬੰਧੀ ਸਭ ਗੱਲਾਂ ਝੂਠ ਹਨ।

ਟੀਚਰਾਂ ਤੋਂ ਜਦ ਹੋਸਟਲ ਵਿੱਚ ਜਾਣ ਸੰੰਬੰਧੀ ਪੁੱਛਿਆ ਤਾਂ ਉਹਨਾਂ ਕਿਹਾ ਕਿ ਸਾਰੇ ਵਿਦਿਆਰਥੀ ਇਕੱਠੇ ਹੋਸਟਲ ਵਿੱਚ ਜਾਂਦੇ ਹਨ ਅਤੇ ਇਕੱਠੇ ਹੀ ਹੋਸਟਲ ਤੋਂ ਬਾਹਰ ਆਉਂਦੇ ਹਨ।ਉਹਨਾਂ ਕਿਹਾ ਕਿ ਟੈਸਟ ਤੋਂ ਬਾਅਦ ਜਦੋਂ ਮਲਿਕਾ ਰਾਣੀ ਦੇ ਕਮਰੇ ਵਾਲੀਆਂ ਲੜਕੀਆਂ ਕਮਰੇ ਵੱਲ ਗਈਆਂ ਤਾਂ ਵਾਰ-ਵਾਰ ਕਮਰਾ ਖੜਕਾਉਣ 'ਤੇ ਕਮਰਾ ਨਹੀਂ ਖੋਲਿਆ ਤਾਂ ਲੜਕੀਆਂ ਪਿਛਲੀ ਗੈਲਰੀ ਰਾਹੀਂ ਖਿੜਕੀ ਵਿੱਚੋਂ ਅੰਦਰ ਗਈਆਂ ਤਾਂ ਉਹਨਾਂ ਦੇਖਿਆ ਕਿ ਲੜਕੀ ਲਟਕ ਰਹੀ ਸੀ। ਉਹਨਾਂ ਲੜਕੀ ਨੂੰ ਲਾਹਿਆ ਇਸੇ ਸਮੇਂ ਪ੍ਰਿੰਸੀਪਲ ਨੇ ਫਿਰ ਆ ਕੇ ਕਿਹਾ ਕਿ ਸਿਵਲ ਸਰਜਨ ਨੇ ਸਾਨੂੰ ਕਿਹਾ ਹੈ ਕਿ ਅਸੀਂ ਕੋਈ ਜਾਣਕਾਰੀ ਨਹੀਂ ਦੇ ਸਕਦੇ। ਅਸੀਂ ਕਮਰਾ ਦਿਖਾਉਣ ਲਈ ਕਿਹਾ ਤਾਂ ਉਹਨਾ ਮਨ•ਾ ਕਰ ਦਿੱਤਾ। ਵਿਦਿਆਰਥਣਾਂ ਨਾਲ ਮਿਲਾਉਣ ਲਈ ਕਿਹਾ ਤਾਂ ਉਹਨਾਂ ਕਿਹਾ ਕਿ ਬੁਰਾ ਨਾ ਮੰਨਿਓ, ਅਸੀਂ ਨਹੀਂ ਮਿਲਾ ਸਕਦੇ, ਸਾਡੀ ਮਜ਼ਬੂਰੀ ਹੈ।

ਇਸ ਤੋਂ ਬਾਅਦ ਜਾਂਚ ਕਮੇਟੀ ਡੀ.ਐੱਸ.ਪੀ ਜਸਵਿੰਦਰ ਸਿੰਘ ਦੇ ਦਫ਼ਤਰ ਗੱਲਬਾਤ ਲਈ ਗਈ ਤਾਂ ਰੀਡਰ ਨੇ ਦੱਸਿਆ ਕਿ ਉਹ ਬਾਹਰ ਗਏ ਹੋਏ ਹਨ, ਉਹਨਾਂ ਨਾਲ ਫ਼ੋਨ 'ਤੇ ਗੱਲ ਹੋਈ ਤਾਂ ਉਹਨਾਂ ਨੇ ਐੱਸ.ਐੱਚ.ਓ ਮਿਲਣ ਲਈ ਕਿਹਾ ਤਾਂ ਅਸੀਂ ਥਾਣੇ ਪਹੁੰਚੇ। ਐੱਸ.ਐੱਚ.ਓ ਵੀ ਮੌਜ਼ੂਦ ਨਹੀਂ ਸੀ, ਉਥੇ ਇੱਕ ਪੁਲਿਸ ਕਰਮਚਾਰੀ ਨਾਲ ਮੁਨਸ਼ੀ ਨੇ ਸਾਨੂੰ ਮਿਲਾਇਆ ਜੋ ਉਸ ਦਿਨ ਘਟਨਾ ਵਾਲੀ ਥਾਂ 'ਤੇ ਗਈ ਪੁਲਿਸ ਪਾਰਟੀ ਵਿੱਚ ਸ਼ਾਮਿਲ ਸੀ। ਉਸ ਨੇ ਕਿਹਾ ਕਿ ਲੜਕੀ ਨੂੰ ਸਟਾਫ਼ ਨੇ ਪੱਖੇ ਤੋਂ ਉਤਾਰਿਆ ਸੀ। ਉੱਥੇ ਟੀਚਰਾਂ ਦੇ ਗਰੁੱਪ ਬਣੇ ਹੋਏ ਸਨ। ਅਸੀਂ ਪਰਚਾ ਕਰ ਦਿੱਤਾ ਹੈ ਅਤੇ ਮੈਡਮ ਦੀ ਗ੍ਰਿਫ਼ਤਾਰੀ ਲਈ ਕੋਸ਼ਿਸ਼ਾਂ ਜਾਰੀ ਹਨ। ਇਸ ਤੋਂ ਬਾਅਦ ਡੀ.ਐੱਸ.ਪੀ ਸਾਹਿਬ ਦਾ ਇੰਤਜਾਰ ਕੀਤਾ। ਉਹਨਾਂ ਦੇ ਵਾਪਸ ਆਉਣ 'ਤੇ ਉਹਨਾਂ ਨੂੰ ਮਿਲੇ ਤਾਂ ਉਹਨਾਂ ਕਿਹਾ ਕਿ ਲੜਕੀ ਟੈਸਟ ਵਿੱਚ ਨਕਲ ਮਾਰ ਰਹੀ ਸੀ, ਇਸ ਕਰਕੇ ਮੈਡਮ ਦੇ ਝਿੜਕਣ ਕਰਕੇ ਲੜਕੀ ਨੇ ਫਾਹਾ ਲਿਆ ਲੱਗਦੈ। ਜਦੋਂ ਜਾਂਚ ਕਮੇਟੀ ਨੇ ਪੁੱਛਿਆ ਕਿ ਇਸ ਪਿਛੇ ਹੋਰ ਕੀ ਕਾਰਨ ਹੋ ਸਕਦੇ ਹਨ? ਲਾਸ਼ ਨੂੰ ਪੁਲਿਸ ਦੇ ਜਾਣ ਤੋਂ ਪਹਿਲਾਂ ਕਿਉਂ ਉਤਾਰਿਆ ਗਿਆ? ਲੜਕੀ ਦੇ ਕਮਰੇ ਦੀ ਫਿਰੋਲਾ-ਫਰਾਲੀ ਕਿਸ ਨੇ ਤੇ ਕਿਉਂ ਕੀਤੀ, ਇਸ ਬਾਰੇ ਕੁਝ ਦੱਸੋ ਤਾਂ ਉਹਨਾਂ ਕਿਹਾ ਕਿ ਇਸ ਬਾਰੇ ਕੁਝ ਨਹੀਂ ਪਤਾ, ਇਸ ਕਰਕੇ ਅਜੇ ਕੁਝ ਨਹੀਂ ਕਹਿ ਸਕਦੇ।

ਜਾਂਚ ਕਮੇਟੀ ਮੈਡਮ ਕਮਲ ਦੇ ਪਤੀ ਲੋਕ ਮੋਰਚਾ ਪੰਜਾਬ ਦੇ ਆਗੂ ਜਗਮੇਲ ਸਿੰਘ ਨੂੰ ਵੀ ਮਿਲੀ। ਉਹਨਾਂ ਦਾ ਕਹਿਣਾ ਸੀ ਕਿ ਮੇਰੀ ਪਤਨੀ ਜੱਥੇਬੰਦੀ ਦੇ ਸੰਘਰਸ਼ਾ ਵਿੱਚ ਹਿੱਸਾ ਲੈਂਦੀ ਰਹੀ ਹੈ ਤੇ ਸਕੂਲ ਵਿੱਚ ਲੜਕੀਆਂ ਨੂੰ ਨਰਸਿੰਗ ਦਾ ਸਮਾਜ ਵਿੱਚ ਕੀ ਰੋਲ ਹੈ? ਅਤੇ ਸਾਡੀ ਕੀ ਜਿੰਮੇਵਾਰੀ ਬਣਦੀ ਹੈ? ਆਦਿ ਸਮਾਜਿਕ ਪੱਖਾਂ 'ਤੇ ਵੀ ਪੜ•ਾਉਂਦੀ ਹੈ। ਉਹਨਾਂ ਕਿਹਾ ਕਿ ਮਲਿਕਾ ਮਾਨਸਿਕ ਤੌਰ 'ਤੇ ਕਾਫ਼ੀ ਪ੍ਰੇਸ਼ਾਨ ਸੀ। ਜਦੋਂ ਦੁਨੀਆਂ ਖਤਮ ਹੋਣ ਦੀ ਖਬਰ ਉੱਡੀ ਤਾਂ ਉਹ ਕਹਿੰਦੀ ਸੀ ਕਿ ਮੈਂ ਤਾਂ ਉਸ ਤੋਂ ਪਹਿਲਾਂ ਹੀ ਮਰ ਜਾਣਾ ਹੈ। ਉਹ ਕਮਰੇ ਵਿੱਚ ਟੁੱਟੀ ਕੁਰਸੀ ਵੀ ਲੈ ਕੇ ਆਈ ਜਿਸ ਨਾਲ ਉਸ ਨੇ ਫਾਹਾ ਲਿਆ। ਜਦ ਪੁੱਛਿਆ ਕਿ ਹੋਰ ਕਿਹੜੇ ਕਾਰਨ ਹੋ ਸਕਦੇ ਹਨ ਜਿਸ ਕਰਕੇ ਉਸ ਨੇ ਆਤਮ-ਹੱਤਿਆ ਕੀਤੀ? ਤਾਂ ਉਹਨਾਂ ਕਿਹਾ ਕਿ ਸਪੱਸ਼ਟ ਤਾਂ ਨਹੀਂ ਕਹਿ ਸਕਦੇ ਪਰ ਘਰੇਲੂ ਹਾਲਤ ਵੀ ਜਿੰਮੇਵਾਰ ਹੋ ਸਕਦੇ ਹਨ। ਉਹਨਾਂ ਕਿਹਾ ਕਿ ਹੁਣ ਤੱਕ ਕਈ ਵਾਰ ਪਰਿਵਾਰ ਨਾਲ ਸੁਲ•ਾ-ਸਫ਼ਾਈ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਸਾਢੇ 7 ਲੱਖ ਰੁਪਇਆ ਮੰਗ ਰਹੇ ਹਨ, ਜਦਕਿ ਕੁਝ ਜਥੇਬੰਦੀਆਂ ਅਤੇ ਸਟਾਫ਼ ਮਿਲ ਕੇ ਮੱਦਦ ਕਰਨ ਨੂੰ ਤਿਆਰ ਹਨ। ਜੇਕਰ ਉਹ ਕਹਿਣ ਕਿ ਮੈਡਮ ਬੇਕਸੂਰ ਹੈ, ਅਸੀਂ ਆਪਣੇ-ਆਪ ਨੂੰ ਦੋਸ਼ੀ ਮੰਨ ਕੇ ਜੁਰਮਾਨਾ ਨਹੀਂ ਭਰਨਾ। ਜਗਮੇਲ ਸਿੰਘ ਹੋਰਾਂ ਕਿਹਾ ਕਿ ਪੁਲਿਸ ਮੈਡਮ ਕਮਲ ਨੂੰ ਵਾਰ-ਵਾਰ ਆਪਣਾ ਬਿਆਨ ਬਦਲਣ ਲਈ ਕਹਿ ਰਹੀ ਸੀ ਕਿ ਤੁਸੀਂ ਕਹਿ ਦੇਵੋ ਕਿ ਲੜਕੀ ਪਾਣੀ ਪੀਣ ਦੀ ਇਜ਼ਾਜਤ ਲੈ ਕੇ ਗਈ ਸੀ, ਮੈਂ ਉਸ ਨੂੰ ਕਮਰੇ ਵਿੱਚੋਂ ਨਹੀਂ ਕੱਢਿਆ। ਪੁਲਿਸ ਵੱਲੋਂ ਮੈਡਮ ਨੂੰ ਆਪਣਾ ਬਿਆਨ ਬਦਲਣ ਦੀ ਗੱਲ ਮਜ਼ਦੂਰ ਆਗੂ ਲਛਮਣ ਸਿੰਘ ਸੇਵੇਵਾਲਾ ਨੇ ਵੀ ਜਾਂਚ ਕਮੇਟੀ ਨੂੰ ਕਹੀ। ਉਹਨਾਂ ਕਿਹਾ ਕਿ ਪੁਲਿਸ ਮੈਡਮ ਨੂੰ ਕਹਿ ਰਹੀ ਸੀ ਕਿ ਜੇਕਰ ਤੁਸੀਂ ਕਲਾਸ ਵਿੱਚੋਂ ਲੜਕੀ ਨੂੰ ਕੱਢਣ ਦੀ ਗੱਲ ਕਹੀ ਤਾਂ 306 ਦਾ ਪਰਚਾ ਹੋ ਸਕਦਾ ਹੈ, ਪਰ ਮੈਡਮ ਨੇ ਕਿਹਾ ਮੈਂ ਝੂਠ ਨਹੀਂ ਬੋਲਾਂਗੀ।

ਸਕੂਲ ਵਿੱਚ ਵਿਦਿਆਰਥਣਾਂ ਨਾਲ ਗੱਲਬਾਤ ਨਾ ਕਰ ਸਕਣ ਦੀ ਹਾਲਤ ਵਿੱਚ ਕਈ ਵਿਦਿਆਰਥਣਾਂ ਨਾਲ ਉਹਨਾਂ ਦੇ ਘਰਾਂ ਦੇ ਪਤੇ ਲੈ ਕੇ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕੀਤੀ। ਪਰ ਉਹ ਕੁਝ ਜ਼ਿਆਦਾ ਬੋਲਣ ਨੂੰ ਤਿਆਰ ਨਹੀਂ ਸਨ ਜਾਂ ਕਈਆਂ ਦੇ ਮਾਪਿਆਂ ਨੇ ਕਿਹਾ ਅਸੀਂ ਉਲਝਣਾ ਨਹੀਂ ਚਾਹੁੰਦੇ। ਲੜਕੀਆਂ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਦੱਸਿਆ ਕਿ ਮਲਿਕਾ ਰਾਣੀ ਨਾਲ ਹੋਇਆ ਤਾਂ ਧੱਕਾ ਹੈ। ਮੈਡਮ ਨੇ ਉਸ ਦਾ ਪੇਪਰ ਵੀ ਖੋਹ ਕੇ ਪਾੜ ਦਿੱਤਾ ਸੀ। ਪਰ ਕੀਤਾ ਵੀ ਕੀ ਜਾ ਸਕਦਾ ਹੈ। ਉਹਨਾਂ ਇਹ ਦੱਸਿਆ ਕਿ ਏ.ਐੱਨ.ਐੱਮ ਦਾ ਕੋਰਸ ਤਾਂ ਬਹੁਤ ਸੌਖਾ ਹੈ, ਜਿਹਨੇ 10ਵੀਂ ਪਾਸ ਕਰ ਲਈ, ਉਹ ਆਸਾਨੀ ਨਾਲ ਏ.ਐੱਨ.ਐੱਮ ਕਰ ਸਕਦਾ ਹੈ। ਦੂਸਰਾ ਸਾਰੀਆਂ ਲੜਕੀਆਂ ਇਕੱਠੀਆਂ ਹੋਸਟਲ ਵਿੱਚ ਆਉਂਦੀਆਂ-ਜਾਂਦੀਆਂ ਹਨ। ਕੋਈ ਇਕੱਲੀ ਲੜਕੀ ਹੋਸਟਲ ਵਿੱਚ ਨਹੀ ਜਾ ਸਕਦੀ। ਜੇਕਰ ਕੋਈ ਲੜਕੀ ਆਪਣੀ ਕਿਤਾਬ ਜਾਂ ਹੋਰ ਕੋਈ ਚੀਜ ਹੋਸਟਲ ਵਿੱਚ ਭੁੱਲ ਆਈ ਹੈ ਤਾਂ ਉਹ ਸਿਰਫ਼ ਇਜਾਜ਼ਤ ਲੈ ਕੇ ਹੋਸਟਲ ਵਿੱਚ ਜਾ ਸਕਦੀ ਹੈ।

ਜਾਂਚ ਕਮੇਟੀ ਲਗਾਤਾਰ ਮੈਡਮ ਕਮਲ ਨੂੰ ਮਿਲਣ ਦੀ ਕੋਸ਼ਿਸ਼ ਕਰਦੀ ਰਹੀ। ਜਾਂਚ ਕਮੇਟੀ ਦੀ ਰਿਪੋਰਟ ਵਿੱਚ ਇਸੇ ਕਰਕੇ ਇੱਕ ਹਫ਼ਤੇ ਦੀ ਦੇਰੀ ਹੋਈ। ਜਾਂਚ ਕਮੇਟੀ ਨੂੰ ਪਹਿਲਾਂ ਮੈਡਮ ਕਮਲ ਨਾਲ ਮਿਲਾਉਣ ਵਿੱਚ ਅਸਮਰੱਥਾ ਦਿਖਾਈ ਗਈ, ਉਸ ਤੋਂ ਬਾਅਦ ਜਗਮੇਲ ਸਿੰਘ ਹੋਰਾਂ ਵੱਲੋਂ ਇੱਕ ਸਾਥੀ ਦਾ ਫ਼ੋਨ ਆਇਆ ਕਿ ਅਸੀਂ ਇਹ ਗੱਲ ਵਿਚਾਰੀ ਹੈ ਤੇ ਤੁਸੀਂ ਇੱਕ ਵਾਰ ਫਿਰ ਮਿਲੋ। ਇਸ ਤੋਂ ਪਹਿਲਾਂ ਅਸੀਂ ਇਹ ਗੱਲ ਮਜ਼ਦੂਰ ਆਗੂ ਲਛਮਣ ਸਿੰਘ ਸੇਵੇਵਾਲਾ ਅਤੇ ਜਗਮੇਲ ਸਿੰਘ ਜੀ ਕੋਲ ਉਠਾ ਚੁੱਕੇ ਸੀ। ਅਸੀਂ 27 ਜੂਨ ਨੂੰ ਫਿਰ ਬਠਿੰਡਾ ਪਹੁੰਚੇ। ਜਿਸ ਸਾਥੀ ਨੇ ਫ਼ੋਨ ਕੀਤਾ ਸੀ, ਉਸ ਨੇ ਕਿਹਾ ਕਿ ਅਗਲੇ ਇੱਕ-ਦੋ ਦਿਨਾਂ ਤੱਕ ਮਿਲਾਵਾਂਗੇ। ਅਸੀਂ ਇਸ ਆਸ 'ਤੇ ਗਏ ਸੀ ਕਿ ਅੱਜ ਮਿਲਾਇਆ ਜਾਵੇਗਾ। ਉਸ ਤੋਂ ਅਗਲੇ ਦਿਨ ਫ਼ੋਨ ਆਉਂਦਾ ਹੈ ਕਿ 30 ਜੂਨ ਨੂੰ ਤੁਸੀਂ ਆ ਜਾਓ। 29 ਜੂਨ ਸ਼ਾਮ ਨੂੰ ਫਿਰ ਫ਼ੋਨ ਆਉਂਦਾ ਹੈ ਕਿ ਅਸੀਂ 4 ਜੁਲਾਈ ਨੂੰ ਮਿਲਾ ਸਕਦੇ ਹਾਂ, ਉਸ ਤੋਂ ਪਹਿਲਾਂ ਨਹੀਂ। ਉਹਨਾਂ ਦੀ ਲਗਾਤਾਰ ਇਸ ਟਾਲ-ਮਟੋਲ ਕਰਕੇ ਅਸੀਂ ਮੈਡਮ ਕਮਲ ਦਾ ਪੱਖ ਜੋ ਕਿ ਉਪਰੋਕਤ ਕਾਰਨਾਂ ਕਰਕੇ ਨਹੀਂ ਲਿਆ ਜਾ ਸਕਦਾ ਸੀ। ਅਸੀਂ ਆਪਣੀ ਰਿਪੋਰਟ ਜਾਰੀ ਕਰ ਰਹੇ ਹਾਂ।

ਸਿੱਟਾ:-

ਮਲਿਕਾ ਰਾਣੀ ਤੇ ਇਹ ਦੋਸ਼ ਲਾਇਆ ਜਾ ਰਿਹਾ ਹੈ ਕਿ ਉਹ ਨਕਲ ਮਾਰਦੀ ਸੀ। ਮਲਿਕਾ ਰਾਣੀ ਨੇ ਮੈਰਿਟ ਦੇ ਆਧਾਰ 'ਤੇ ਦਾਖਲਾ ਲਿਆ ਨਾ ਕਿ ਪਿਛਲੇ ਦਰਵਾਜੇ ਰਾਹੀਂ ਅੰਦਰ ਆਈ। ਉਸ ਨੇ ਦਸਵੀਂ ਪਹਿਲੇ ਸਥਾਨ ਵਿੱਚ 67% ਅੰਕ ਲੈ ਕੇ ਪਾਸ ਕੀਤੀ ਅਤੇ ਵਿਦਿਆਰਥੀਆਂ ਨੂੰ ਮੁਕਾਬਲਤਨ ਔਖੇ ਲੱਗਣ ਵਾਲੇ ਵਿਸ਼ਿਆਂ ਜਿਵੇਂ ਗਣਿਤ ਵਿੱਚੋਂ 100 ਵਿੱਚੋਂ 77, ਅੰਗਰੇਜੀ ਵਿੱਚੋਂ 76, ਸਾਇੰਸ ਵਿੱਚੋਂ 68 ਅੰਕ ਪ੍ਰਾਪਤ ਕੀਤੇ ਅਤੇ ਏ.ਐੱਨ.ਐੱਮ ਜੋ ਕਿ ਆਸਾਨ ਕੋਰਸ ਹੈ ਅਤੇ ਦਾਖਲਾ 10ਵੀਂ ਦੇ ਆਧਾਰ 'ਤੇ ਹੁੰਦਾ ਹੈ। ਮਲਿਕਾ ਰਾਣੀ ਨੇ ਬਾਰ•ਵੀਂ ਜਮਾਤ ਵੀ ਪਾਸ ਕੀਤੀ ਸੀ ਜਿਸ ਵਿੱਚ ਉਸ ਦੇ 58% ਅੰਕ ਹਨ।

1. ਜਦੋਂ ਏ.ਐੱਨ.ਐੱਮ ਦੀ ਪੜ•ਾਈ ਬਹੁਤ ਆਸਾਨ ਤੇ ਆਮ ਜਾਣਕਾਰੀ ਤੱਕ ਹੀ ਸੀਮਿਤ ਹੈ ਫਿਰ ਉਸ ਨੂੰ ਨਕਲ ਦੀ ਜਰੂਰਤ ਕਿਉਂ ਪਈ?

2. ਉਹ ਪੇਪਰ ਜੋ ਇੰਟਰਨਲ ਅਸੈਸਮੈਂਟ ਦਾ ਹਿੱਸਾ ਨਹੀਂ ਅਤੇ ਜਿਸ ਦੇ ਕਿਤੇ ਨੰਬਰ ਵੀ ਨਹੀਂ ਜੁੜਣੇ, ਉਸ ਵਿੱਚ ਨਕਲ ਮਾਰਨ ਦੀ ਕੀ ਜਰੂਰਤ ਹੈ?

3. ਉਸ ਨੂੰ ਨਕਲ ਕਰਨ ਦੀ ਆਦਤ ਸੀ (ਜਮਹੂਰੀ ਅਧਿਕਾਰ ਸਭਾ ਦੀ ਰਿਪੋਰਟ ਅਨੁਸਾਰ)। ਉਹ ਕਿੰਨੇ ਵਾਰ ਨਕਲ ਮਾਰਦੀ ਫੜੀ ਗਈ? ਉਸ ਖਿਲਾਫ਼ ਹੁਣ ਤੱਕ ਕੀ ਅਤੇ ਕਿੰਨੀ ਵਾਰ ਕਾਰਵਾਈ ਕੀਤੀ ਗਈ? ਇਸ ਤੋਂ ਪਹਿਲਾਂ ਇਸ ਸ਼ੈਸ਼ਨ ਵਿੱਚ ਪਹਿਲਾਂ ਕਿੰਨੀ ਵਾਰ ਹਾਊਸ ਟੈਸਟ ਹੋਇਆ? ਉਸ ਵਿੱਚ ਮਲਿਕਾ ਰਾਣੀ ਦੀ ਕਾਰਗੁਜ਼ਾਰੀ ਕੀ ਸੀ? ਇਸ ਦੀ ਜਾਣਕਾਰੀ ਅਸੀਂ ਸੂਚਨਾ ਅਧਿਕਾਰ ਕਾਨੂੰਨ (ਆਰ.ਟੀ.ਆਈ) ਤਹਿਤ ਮੰਗ ਰਹੇ ਹਾਂ।

4. ਨਕਲ ਸੰਬੰਧੀ ਨਿਯਮ ਇਹ ਕਹਿੰਦੇ ਹਨ, ਜੇਕਰ ਪ੍ਰੀਖਿਆ ਸਾਲਾਨਾ ਜਾਂ ਸਮੈਸਟਰ ਮੁਤਾਬਿਕ ਹੈ ਜਾਂ ਕੋਈ ਵੀ ਹਾਊਸ ਟੈਸਟ ਹੈ। ਨਕਲ ਕਰਨ ਵਾਲੇ ਵਿਦਿਆਰਥੀ ਤੇ ਕਾਰਵਾਈ ਦਾ ਅਧਿਕਾਰ ਸਿਰਫ਼ ਉੱਡਣ ਦਸਤੇ (6lying Squad) ਜਾਂ ਸੰਸਥਾ ਵੱਲੋਂ ਨਾਮਜ਼ਦ ਅਧਿਕਾਰੀ ਨੂੰ ਹੀ ਹੈ, ਨਾ ਕਿ ਪੇਪਰ ਲੈ ਰਹੇ ਟੀਚਰ ਨੂੰ। ਮੈਡਮ ਕਮਲ ਨੇ ਕਿਹੜੇ ਅਧਿਕਾਰ ਤਹਿਤ ਉਸ ਨੂੰ ਕਲਾਸ ਵਿੱਚੋਂ ਕੱਢਿਆ ਅਤੇ ਬਾਹਰ ਬਿਠਾਇਆ? ਨਕਲ ਸੰਬੰਧੀ ਇਸ ਕਾਲਜ ਦੇ ਨਿਯਮਾਂ ਬਾਰੇ ਵੀ ਸੂਚਨਾ ਅਧਿਕਾਰ ਕਾਨੂੰਨ (ਆਰ.ਟੀ.ਆਈ) ਤਹਿਤ ਜਾਣਕਾਰੀ ਮੰਗੀ ਜਾ ਰਹੀ ਹੈ।

5. ਮਲਿਕਾ ਰਾਣੀ ਨੂੰ ਜਮਹੂਰੀ ਅਧਿਕਾਰ ਸਭਾ ਰਿਪੋਰਟ ਅਨੁਸਾਰ ਤੇ ਮੈਡਮ ਦੇ ਪਤੀ ਜਗਮੇਲ ਸਿੰਘ ਅਨੁਸਾਰ ਮਾਨਸਿਕ ਰੋਗੀ ਹੋਣ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ ਪਰ ਜੋ ਸਕੂਲ ਵਿੱਚ ਵਿਦਿਆਰਥੀਆਂ ਦਾ ਹਰ ਮਹੀਨੇ ਮੈਡੀਕਲ ਟੈਸਟ ਹੁੰਦਾ ਹੈ। ਜਿਸ ਵਿੱਚ ਵਿਦਿਆਰਥੀ ਨੂੰ ਜੇਕਰ ਕੋਈ ਸਿਹਤ ਸੰੰਬੰਧੀ ਸਮੱਸਿਆ ਹੈ, ਉਸਦਾ ਤੇ ਉਸ ਦੇ ਇਲਾਜ ਦਾ ਬਕਾਇਦਾ ਰਿਕਾਰਡ ਰੱਖਿਆ ਜਾਂਦਾ ਹੈ ਕੀ ਉਸ ਵਿੱਚ ਉਸ ਦੀ ਮਾਨਸਿਕ ਪ੍ਰੇਸ਼ਾਨੀ 'ਤੇ ਚੱਲ ਰਹੇ ਇਲਾਜ ਦਾ ਵੇਰਵਾ ਹੈ?

6. ਜੇਕਰ ਉਹ ਵਾਰ-ਵਾਰ ਪਿਤਾ ਕੋਲ ਜਾਣ ਦੀ, ਭਰਾ ਕੋਲ ਜਾਣ ਦੀ, ਦੁਨੀਆਂ ਨੇ ਖਤਮ ਹੋ ਜਾਣਾ, ਮੈਂ ਪਹਿਲਾਂ ਹੀ ਮਰ ਜਾਣਾ ਆਦਿ ਗੱਲਾਂ ਕਰਦੀ ਸੀ ਤਾਂ ਸੰਸਥਾ ਵਿੱਚ ਇਸ ਤਰ•ਾਂ ਦੇ ਵਿਗੜੇ ਹੋਏ ਮਾਨਸਿਕ ਤਵਾਜਨ ਵਾਲੇ ਵਿਦਿਆਰਥੀ ਨੂੰ ਅਣਗੌਲਿਆਂ ਕਿਉਂ ਕੀਤਾ ਗਿਆ? ਉਸ ਦਾ ਕਿਸੇ ਮਨੋਵਿਗਿਆਨਕ ਮਾਹਿਰ ਤੋਂ ਇਲਾਜ ਕਿਉਂ ਨਹੀਂ ਕਰਵਾਇਆ ਗਿਆ। ਇਸ ਗੈਰ ਜਿੰਮੇਵਾਰੀ ਲਈ ਕੌਣ ਜਿੰਮੇਵਾਰ ਹੈ?

7. ਕਿਸੇ ਵਿਅਕਤੀ ਨੂੰ ਮਾਨਸਿਕ ਤੌਰ 'ਤੇ ਰੋਗੀ ਐਲਾਨਣ ਦਾ ਵਿਗਿਆਨਕ ਆਧਾਰ ਕੀ ਹੈ? ਜਾਂ ਮ੍ਰਿਤਕਾ ਬਾਰੇ ਸਿਰਫ਼ ਦੂਸ਼ਣਬਾਜੀ ਹੋ ਰਹੀ ਹੈ।

8. ਲੜਕੀ ਦੇ ਪਰਿਵਾਰਕ ਮਾਹੌਲ ਨੂੰ ਵੀ ਜਿੰਮੇਵਾਰ ਮੰਨਿਆ ਜਾ ਰਿਹਾ ਹੈ ਕਿ ਵਿਦਿਆਰਥਣ ਨੂੰ ਉਸ ਦੇ ਪਿਤਾ ਤੇ ਮਾਮੇ ਦੇ ਲੜਕੇ ਦੀ ਬਹੁਤ ਯਾਦ ਆਉਂਦੀ ਸੀ। ਉਸ ਦੇ ਪਿਤਾ ਦੀ ਮੌਤ ਜਦ ਉਹ 6 ਸਾਲ ਦੀ ਉਸ ਵੇਲੇ ਹੋ ਗਈ ਸੀ। ਕੀ ਉਸ ਨੇ 16 ਸਾਲ ਬਾਅਦ ਪਿਤਾ ਦੇ ਵੈਰਾਗ ਵਿੱਚ ਖੁਦਕੁਸ਼ੀ ਕਰਨੀ ਸੀ? ਮਾਮੇ ਦਾ ਲੜਕਾ ਫਰੀਦਕੋਟ ਰਹਿ ਰਿਹਾ ਸੀ। ਇਹ ਕੋਟਕਪੂਰੇ ਰਹਿ ਰਹੇ ਸਨ। ਉਸ ਦੀ ਮੌਤ ਨੂੰ ਵੀ ਇੱਕ ਸਾਲ ਬੀਤ ਚੁੱਕਾ ਹੈ। ਪਰਿਵਾਰ ਵਿੱਚ ਉਸ ਨੂੰ ਸਭ ਤੋਂ ਵੱਧ ਪੜ•ਾਇਆ ਜਾ ਰਿਹਾ ਸੀ। ਉਹ ਪਰਿਵਾਰ ਦੀ ਇੱਕਲੌਤੀ ਲੜਕੀ ਸੀ। ਵੱਧ ਪੜ•ੀ-ਲਿਖੀ ਹੋਣ ਕਰਕੇ ਘਰ ਦੀਆਂ ਜਿੰਮੇਵਾਰੀਆਂ ਵੀ ਸਮਝਦੀ ਸੀ। ਜਿਵੇਂ ਉਸ ਦੀ ਮਾਤਾ ਕਮੇਟੀ ਪਾਉਂਦੀ ਹੈ, ਜਿਸ ਦਾ ਹਿਸਾਬ-ਕਿਤਾਬ ਵੀ ਉਹ ਖੁਦ ਰੱਖਦੀ ਸੀ। ਇਹਨੀ ਦਿਨੀਂ ਉਸ ਦੇ ਸਕੇ ਭਰਾ ਕਮਲਜੀਤ ਦੀ ਮੰਗਣੀ ਦੀਆ ਤਿਆਰੀਆਂ ਚੱਲ ਰਹੀਆਂ ਸਨ, ਉਹ ਆਪਣੀ ਹੋਣ ਵਾਲੀ ਭਾਬੀ ਲਈ ਖੁਸ਼ੀ-ਖੁਸ਼ੀ ਨਵੇਂ ਕੱਪੜੇ ਅਤੇ ਹੋਰ ਸਾਮਾਨ ਵੀ ਖਰੀਦ ਕੇ ਲਿਆਈ ਸੀ। ਕੀ ਇਹ ਪਰਿਵਾਰਕ ਮਾਹੌਲ ਉਸ ਨੂੰ ਖੁਦਕੁਸ਼ੀ ਲਈ ਮਜ਼ਬੂਰ ਕਰ ਸਕਦਾ ਹੈ?

9. ਕਮਰੇ ਦੀ ਫਰੋਲਾ-ਫ਼ਰਾਲੀ ਪੁਲਿਸ ਜਾਂ ਉਸ ਦੇ ਮਾਪਿਆਂ ਦੀ ਗੈਰਹਾਜ਼ਰੀ ਵਿੱਚ ਕਿਉਂ ਕੀਤੀ ਗਈ? ਹੋ ਸਕਦਾ ਹੈ ਉਸ ਨੇ ਕੋਈ ਖੁਦਕੁਸ਼ੀ ਸੰਬੰਧੀ (Suicide Note) ਲਿਖਿਆ ਹੋਵੇ? ਉਸ ਨੂੰ ਫਰੋਲਾ-ਫ਼ਰਾਲੀ ਦੌਰਾਨ ਨਸ਼ਟ ਕੀਤਾ ਗਿਆ ਹੋਵੇ?

10. ਸੰਸਥਾ ਦੇ ਮੁਖੀ ਤੇ ਵਿਦਿਆਰਥਣਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਹੋਸਟਲ ਵਿੱਚੋਂ ਵਿਦਿਆਰਥਣਾਂ ਇਕੱਠੀਆਂ ਕਲਾਸ ਵਿੱਚ ਜਾ ਸਕਦੀਆਂ ਹਨ ਅਤੇ ਛੁੱਟੀ ਵੇਲੇ ਇਕੱਠੀਆਂ ਵਾਪਸ ਆ ਸਕਦੀਆਂ ਹਨ, ਕੋਈ ਇਕੱਲੀ ਲੜਕੀ ਹੋਸਟਲ ਵਿੱਚ ਨਹੀਂ ਆ-ਜਾ ਸਕਦੀ ਫਿਰ ਮਲਿਕਾ ਰਾਣੀ ਕਿਵੇਂ ਇਕੱਲੀ ਹੋਸਟਲ ਅੰਦਰ ਚਲੀ ਗਈ? ਜੇ ਗਈ ਤਾਂ ਕਿਸ ਦੀ ਆਗਿਆ ਲੈ ਕੇ ਗਈ?

11. ਸੰਸਥਾ ਦਾ ਮਾਹੌਲ ਜੋ ਜਾਂਚ ਕਮੇਟੀ ਸਾਹਮਣੇ ਆਇਆ ਵਿਦਿਆਰਥਣਾ ਦਾ ਅਧਿਆਪਕਾਂ ਨੂੰ ਪਾਣੀ ਪਿਲਾਉਣਾ ਅਤੇ ਵਾਰਡਨ ਵੱਲੋਂ ਮਲਿਕਾ ਰਾਣੀ ਨੂੰ ਦਰਜਾ ਚਾਰ ਮੁਲਾਜ਼ਮ ਰਜਿੰਦਰ ਨੂੰ ਬੁਲਾਉਣ ਲਈ ਭੇਜਣਾ, ਕੀ ਇਹ ਕੰਮ ਸੇਵਾਦਾਰ ਦਾ ਨਹੀਂ? ਡਿਊਟੀ ਸਮੇਂ ਵਾਰਡਨ ਦਾ ਸਬਜੀ ਖਰੀਦਣ ਚਲੇ ਜਾਣਾ ਆਦਿ ਸੰਸਥਾ ਦੇ ਗੈਰ-ਜਮਹੂਰੀ ਮਾਹੌਲ ਨੂੰ ਬਿਆਨ ਕਰਦੇ ਹਨ।

12. ਵਿਦਿਆਰਥੀਆਂ ਦਾ ਘਟਨਾ ਬਾਰੇ ਖੁੱਲ ਕਿ ਨਾ ਬੋਲਣ ਲਈ ਇੰਟਰਨਲ ਅਸੈਸਮੈਂਟ ਦਾ ਟੀਚਰ ਦੇ ਹੱਥ ਹੋਣਾ ਵੀ ਇੱਕ ਕਾਰਨ ਹੋ ਸਕਦਾ ਹੈ। ਇਸ ਦੀ ਵੀ ਗਹਿਰਾਈ ਵਿੱਚ ਜਾਂਚ ਹੋਣੀ ਚਾਹੀਦੀ ਹੈ।

13. ਜੇ ਪੁਲਿਸ ਅਧਿਕਾਰੀ ਮੈਡਮ ਨੂੰ ਬਿਆਨ ਬਦਲਣ ਦੀ ਸਲਾਹ ਦਿੰਦੇ ਸਨ ਤਾਂ ਕਿ 306 ਦਾ ਪਰਚਾ ਨਾ ਹੋਵੇ, ਉਹ ਜੇਕਰ ਜਾਂਚ ਕਰ ਰਹੇ ਹਨ ਤਾਂ ਉਹਨਾਂ ਨੂੰ ਤੁਰੰਤ ਜਾਂਚ ਤੋਂ ਹਟਾ ਕੇ ਮੈਜਿਸਟ੍ਰੇਟ ਪੱਧਰ ਦੀ ਜਾਂਚ ਕਰਵਾਈ ਜਾਵੇ ਤਾਂ ਕਿ ਪੀੜਤ ਪਰਿਵਾਰ ਨਾਲ ਬੇਇਨਸਾਫ਼ੀ ਨਾ ਹੋਵੇ। ਮਲਿਕਾ ਰਾਣੀ ਦੇ ਪਰਿਵਾਰ ਨੂੰ ਦਸ ਲੱਖ ਰੁਪਏ ਦੀ ਮਾਲੀ ਸਹਾਇਤਾ ਅਤੇ ਇੱਕ ਪਰਿਵਾਰਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਦਿੱਤੀ ਜਾਵੇ।ਜਾਂਚ ਕਮੇਟੀ ਇਹਨਾਂ ਸਵਾਲਾਂ ਤੇ ਮੰਗਾਂ ਨੂੰ ਉਭਾਰਦੀ ਹੋਈ ਐਲਾਨ ਕਰਦੀ ਹੈ ਕਿ ਜੇਕਰ ਇਸ ਦੀ ਉੱਚ ਪੱਧਰੀ ਜਾਂਚ ਨਹੀਂ ਹੁੰਦੀ ਅਤੇ ਮੌਤ ਦੇ ਕਾਰਨਾਂ ਨੂੰ ਸਾਹਮਣੇ ਨਹੀਂ ਲਿਆਂਦਾ ਜਾਂਦਾ ਤਾਂ ਪੰਜਾਬ ਸਟੂਡੈਂਟਸ ਯੂਨੀਅਨ ਉਹਨਾਂ ਸਾਰੀਆਂ ਜੱਥੇਬੰਦੀਆਂ ਜੋ ਦੱਬੇ-ਕੁਚਲੇ ਲੋਕਾਂ ਲਈ ਇਨਸਾਫ਼ ਦੀ ਗੱਲ ਕਰਦੀਆਂ ਹਨ, ਨੂੰ ਨਾਲ ਲੈ ਕੇ ਸੰਘਰਸ਼ ਕਰਨ ਲਈ ਮਜ਼ਬੂਰ ਹੋਵੇਗੀ ਅਤੇ ਪੀ.ਐੱਸ.ਯੂ ਸਾਰੀਆਂ ਜੱਥੇਬੰਦੀਆਂ ਨੂੰ ਅਪੀਲ ਕਰਦੀ ਹੈ ਕਿ ਇਸ ਸੰਵੇਦਨਸ਼ੀਲ ਮਸਲੇ ਵਿੱਚ ਬਿਨਾਂ ਜਾਂਚ ਪੜਤਾਲ ਕੀਤਿਆਂ ਅਤੇ ਸਹੀ ਕਾਰਨ ਸਾਹਮਣੇ ਆਉਣ ਤੱਕ ਨਿੱਜੀ ਲਿਹਾਜਦਾਰੀਆਂ ਪੁਗਾਉਣ ਲਈ ਕਿਸੇ ਦੀ ਮੱਦਦ ਨਾ ਕਰਨ।

ਵੱਲੋਂ:-

ਜੋਨਲ ਕਮੇਟੀ ਪੀ.ਐੱਸ.ਯੂ,
ਰਜਿੰਦਰ ਸਿੰਘ, ਜਨਰਲ ਸਕੱਤਰ
# 94639-10423
ਸੁਖਵਿੰਦਰ ਸਰੀਂਹਵਾਲਾ,
ਜੋਨਲ ਪ੍ਰਧਾਨ
ਕਰਮਜੀਤ ਕੋਟਕਪੂਰਾ,
ਜੋਨਲ ਸਕੱਤਰ।

No comments:

Post a Comment